شبع بنتك مقال للكاتبة سماح النزلاوى عن جانب مهم من التربية وهو إشباع الجانب العاطفي لدى الأبناء وتأثيره على شخصية وسلوك الطفل ،
شبع بنتك
بقلم سماح النزلاوى
عزيزى الزوج
اسمع منى مجرد ما الدكتور يقولك مبروك جايلك بنوتة
وبصرف النظر حسيت بالفرحة ولا كان نفسك فى ولد ما تشغلش نفسك بتوفير مصاريف الاكل والشرب والمدارس خالص
فكر فى حاجة واحدة بس ازاى تكون بنتك شبعانه
ايوا شبعانه شبعانه حب واهتمام وحنيه وتقدير كل البنات وفيما بعد الستات فى الحياة نوعين بس
بنت شبعانه وبنت جعانة وانت بقى صاحب القرار بنتك تكون مين فيهم
البنت الشبعانه هتلاقيها واثقة فى نفسها ناجحة مش اى حد ولااى موقف يأثر عليها او فيها
قراراتها غالبا صح شخصيتها قويه وواثقة من نفسها محددة اهدافها وطريقها واختياراتها عن اقتناع
عندها رصيد ومخزون من الحب والتقدير ساندها فى كل خطوات حياتها
لما بتختار رجل يشاركها الحياه بتختار صح بتشغل عقلها وقلبها وتقارن
ولا ملقتش الرجل المناسب مش مشكله الدنيا ماشيه ورصيدها من الحب والاهتمام مكفيها والبركة فيك انت اول رجل فى حياتها ومصدر الرصيد ده
اما بقى البنت الجعانه فدايما هتلاقيها مهزوزة متخبطة اضعف من انها تاخد قرار او متسرعة فى قرارتها
عاوزة ترضى اى حد الا نفسها
والطامة الكبرى ان اول شخص هتحس معاه بالاهتمام والتقدير والحب هتتمسك به حتى لو كله عيوب
عارف ليه ؟
لانه لمس الرصيد الخالى عندها من الحب والى حضرتك كأب كنت لازم تملاه
هتدور عليك فى كل رجل تقابله وغالبا حكمها على الناس غلط نموذج لما تقابله هتشعر بالشفقة
ودلوقتى خلينى اسألك وجاوب مع نفسك
تحب تكون بنتك مين فيهم
اسمع منى ….. شبع بنتك
سماح النزلاوى
samahsalah36@yahoo.com
Be the first to comment on "شبع بنتك"